Еурофарм Работник со победа го одбележа дебитантскиот настап во ракометната СЕХА лига. Во салата „Боро Чурлевски“ во Битола е совладан московски Спартак со 34:29 (полувреме: 15:13) во меч од воведното коло во деветтата сезона на регионалното натпреварување.
Невен Стјепановиќ со 10 гола беше најефикасен играч на натпреварот, пет за „фармацевтите“ додаде Марин Вегар додека Никола Митревски забележа 10 одбрани на голот на битолчани. Александар Деревен, пак, ја предводеше листата на стрелци кај рускиот претставник со осум погодоци.
Со победа на домашен терен во новата сезона влезе и Вардар кој во првото коло ја оправда фаворитската улога против Пекинг Спорт Јуниверзити со 37:23 (полувреме: 19:12).
Вардарци во наредното коло ќе гостуваат кај екипата на Мотор Запорожје, а Еурофарм Работник во Битола ќе игра против Металопластика.
СЕХА лига, 1 коло
Група А: Вардар – Пекинг Спорт Јуниверзити 37:23, Татран Прешов – Мотор Запорожје 24:25, Војводина – Нексе 29:23.
Група Б: Еурофарм Работник – Спартак Москва 34:29, Металопластика – ППД Загреб 25:28, Мешков Брест – Веспрем 27:28.