Фенербахче се сопна на првата пречка при одбрана на титулата во кошаркарската Евролига. Континенталниот првак загуби од Уникаха на гостувањето во Малага со 68:67. Клучен за конечниот исход на средбата беше периодот од 31 минута до 38. во кој шпанскиот состав направи серија од 18:3. Последните девет секунди ги имаа момчињата на Жељко Обрадовиќ, но обидот за тројка на Костас Слукас заврши на обрачот наместо низ него.
Клучен, пак, во стастистиката беше офанзивниот скок. Уникаха забележа 16 во противничкиот рекет наспроти четирите на европскиот првак, Уникаха „продаде“ и само осум топки и на крајот заслужено се радуваше на големиот триумф и покрај очајниот шут за три поени (5/27).
Шермадини беше најефикасен во победничката екипа со 12 поена, Мусли додаде девет, а Недовиќ и Вачински по осум во уривање на гигантот од Босфорот. Слукас со 15 коша, Датоме со 13 и Весели во 12 беа најефективни кај Фенербахче.
Евролига, 1 коло
Уникаха Малага – Фенербахче 68:67
Олимпијакос – Басконија 75:64
Бросе Бамберг – Макаби Тел Авив 71:88
ЦСКА Москва – Милано 93:84
Анадолу Ефес – Реал Мадрид 74:88
Петок
Химки – Валенсија
Жалгирис – Црвена звезда
Барселона – Панатинаикос