Европската комисија одлучи да ја казни платформата X во сопственост на американскиот милијардер Илон Маск со 120 милиони евра за кршење на Законот за дигитални услуги.
Комисијата утврди дека X не се придржувал кон три одредби од Законот за дигитални услуги. Првата се однесува на сината ознака, за која Комисијата утврди дека ги заведува корисниците да веруваат дека сметка со сина ознака е всушност потврден корисник.
Втората е прекршување на барањето за обезбедување достапност на складиште за реклами, во кое може да се пребаруваат сите реклами прикажани на платформата, што е особено важно за преглед на заведувачки политички реклами во изборните кампањи. Третата е прекршување на одредба што им овозможува на истражувачите да анализираат јавно достапни податоци за X.
Заведувањето на корисниците со сини ознаки, криењето информации во рекламите и исклучувањето на истражувачите немаат место на интернетот на ЕУ“, изјави извршната потпретседателка за технолошки суверенитет, безбедност и демократија, Хена Виркунен.
Потпретседателот на САД, Џ.Д. Венс, напиша за X дека „ЕУ треба да ја поддржува слободата на говорот, а не да ги напаѓа американските компании за глупост“.
Претседателот на САД, Доналд Трамп, претходно ги критикуваше европските дигитални закони како антиконкурентски.
Комисијата истакнува дека износот на казната, кој изгледа исклучително мал со оглед на приходите што ги генерира X, се одредува според принципот на пропорционалност, кој ја проценува природата, сериозноста, времетраењето и повторувањето на прекршувањето на одредбите од европското право.