Двајцата највисоки претставници на Европската Унија, претседателите на Европската комисија и на Европскиот совет, Урсула фон дер Лајен и Шарл Мишел, денеска го потпишаа договорот за „развод“ со Велика Британија. Со нивното официјално парафирање/одобрување, текстот на договорот на 29 јануари ќе биде поднесен и во Европскиот парламент на ратификација.
Потоа, наредниот четврток дипломатите од државите-членки на ЕУ ќе треба и писмено да го одобрат договорот, со што ќе го гарантираат напуштањето на Велика Британија на заедницата точно на полноќ на 31 јануари.
„Шарл Мишел и јас тукушто го потпишавме Договорот за повлекувањето на Обединетото Кралство од ЕУ, што го отвора патот за негово ратификување од Европскиот парламент”, напиша на Твитер шефицата на Комисијата, Урсула фон дер Лајен.
Во оделен твит Мишел напиша – „Нештата неизбежно ќе се сменат, но нашето пријателство ќе остане. Почнуваме ново поглавје како партнери и сојузници“ за потоа на француски да додаде – „Се стремиме оваа нова страница да ја напишеме заедно“.