Шахистите на Алкалоид одлучно се движат кон нова титула во Европскиот клупски куп. И засега се одлични во тоа. По четири одиграни кола во Порто Карас имаат максимален ефект (четири победи), се наоѓаат на делба на првото место во севкупниот пласман со тимот на Равена со фантастични изгледи за повторување на успехот од 2016 година кога се вратија од Нови Сад во Скопје со победничкиот пехар.
Македонски шаховски првак во четвртото коло го совлада и Медњи Всадник од Санкт Петербург со 3,5:2,5. По цел поен за „фармацевтите“ освоија Динг Лирен и Павел Елјанов, ремизираа Ју Јангји, Дмитри Андрејкин и Дмитри Јаковенко, единствениот пораз го доживеа Јуриј Криворучко во партијата со Кирил Алексенко.
Тимот чиј капитен е Драгољуб Јаќимовиќ во третото коло беше подобар од Вердер со 5:1, во второто коло славеше над израелски Реховот со 5,5:0,5 додека на стартот го декласира луксембуршки Муконсулт Апелдорн со 6:0. Утре попладне од 15 часот Алкалоид ќе игра против Равена во дербито на петтата рунда на Европскиот клупски куп во шах.
Победа во четвртото коло во Порто Карас забележаа и шахистите на Гамбит Асеко кои со 3,5:2,5 беа подобри од естонски Ревал Спорт. Своите партии ги добија Орце Данчевски, Зоран Стојчевски и Љубиша Андоновски, поен подели Никола Николовски, загубија Петар Арнаудов и Дејан Динев.
Гамбит Асеко е на 20. место по четири кола по победата на стартот против Вајт Најтс од Велс со 5:1, ремито (3:3) против Солун во второто коло и поразот (1:4) од ДЈК Ауфвартс Ахен во третото коло. Утре од 15 часот ќе игра со холандски БСГ.