Европскиот суд за човекови права донесе пресуда со која се повикува Русија да ги признае истополовите заедници. Кремљ веднаш реагираше, наведувајќи дека истополовите бракови во Русија „не се дозволени“, согласно уставните измени што беа усвоени во минатата година.
Пресудата на Судот во Стразбур е за тужбата што ја поднесоа три Русинки кои не добија дозвола од руските власти да се венчаат. Заклучок на Судот е дека Русија со тоа го прекршила членот осум од Европската конвенција за човекови права, кој го нагласува правото на почитување на приватниот и семејниот живот.
– Русија имаше обврска да обезбеди почитување на приватниот и семеен живот на подносителите на барањето, обезбедувајќи законска рамка која ќе им овозможи признавање на нивните врски, се наведува во пресудата.
Европскиот суд за човекови права го отфрли аргументот на Москва дека спротивставувањето на истополовите заедници е широко распространето во Русија, наведувајќи дека „остварувањето на правата на припадниците на малцинството не може да зависи од прифаќањето на мнозинството“.