Македонскиот машки ракометен првак го „разнесе“ европскиот. Вардар го доби Кјелце со 40:34 во дербито на шестото коло во Лигата на шампиони и го презеде врвот на табелата во групата Б. Победникот беше решен во вториот дел во кој „црвено-црните“ постигнаа 22 гола, а примија 16 по нерешените 18:18 на полувремето. Карачиќ беше прв стрелец на средбата со 9 погодоци, осум постигнаa Алекс Душабаев и Тимур Дибиров, Агинагалде, пак, го предводеше полскиот тим со осум гола.
Првото полувреме донесе неизвесен ракомет со многу пресврти. И Вардар и Кјелце имаа периоди со серија голови за меѓусебно бркање на семафорот. Воведот на средбата мина во знак на „црвено-црните“ кои имаа 3:1 на што гостите одговорија со 0:4 за водство. До средина на воведните 30 минути се играше гол за гол по што одново на сцена стапија момците на Раул Гонзалез. Се дадоа во ново ракометно бегство, „споија“ три реализации во низа, но Полјаците повторно стигнуваа и обезбедуваат приклучок во натпреварот. Таквата слика остана непроменета иако вардарци може да заминат на одмор ако ги материјализираа неколкуте интервенции на Штербик и беа поприсебни при одбиените топки од него на линијата од шест метри. Задоволство, сепак, имаше како најава за хепинед бидејќи домашните беа разноводни во нападот, се закануваа и пробиваа од секаде, преку крила, бекови, кружни напаѓачи.
Израмнета игра продолжи и во наредните 10 минути по враќање на терен. По нив, вардарци направија нови 3:0 и тргнаа во решавачко „одлепување“ од европскиот титулар. Концентрирани и презицни во нападот, ја „стегнаа“ одбраната, Штербик беше одличен на голот во тие моменти што го најавија падот на Кјелце чии ракометари почнаа да „исчезнуваат“ во СЦ „Јане Сандански“. Околу 48 минута веќе беше 33:27 за навестување во, можеби, нов дебакл на Полјаците во Скопје. Навраќање на ланските 34:24 дојде во последните шест минути кога македонскиот првак ги имаше најубедливото водство (37:29), па мечот во голем стил го приведе кон крај за петта победа во конкуренцијата и лидерска позиција со 10 бода, еден повеќе од Рајн Некар Левен кој го пречекува Вардар на 17 ноември.
Вардар – Кјелце 40:34 (18:18)
СЦ „Јане Сандански“ во Скопје. Гледачи: 6.000. Судии: Мирослав Бадура (Словачка) и Јарослав Ондогрецула (Словачка).
Вардар: Штербик, Милиќ, Стоилов /, Фереира Мораеш /, Македа 1, Деревен /, Карачиќ 9, Душебаев 8, Абутовиќ /, Кањелас /, Циндриќ 3, Чупиќ 2, Дибиров 8, Шишкарев 1, Борозан 4, Марсениќ 4. Тренер: Раул Гонзалез.
Седмерци: 4/5. Исклучувања: 8 минути.
Кјелце: Шмал, Ивиќ, Рајхман 4, Кус 2, Агинагалде 8, Бјелецки 3, Јахлевски 1, Штрлек 2, Лиевски /, Јуркиевиц 5, Пасковски 2, Зорман 3, Бомбач 3, Ѓукиќ 1. Тренер: Талант Душабаев.
Седмерци: 6/9. Исклучувања: 4 минути.