Украинскиот претседател Володимир Зеленски му се заблагодари на Бајден за неговата „непоколеблива поддршка“, додека германскиот канцелар Олаф Шолц рече дека „одлуката да не се кандидира повторно заслужува признание“.
Од цела Европа му се оддадоа почит на Џо Бајден кој во неделата објави дека се повлекува од претседателската трка и ја поддржува неговата потпретседателка Камала Харис да го замени.
Во писмената изјава, Бајден рече дека му била најголема чест во животот да биде претседател и вети дека ќе остане на оваа функција до крајот на неговиот мандат во јануари.
„Ќе зборувам со нацијата подоцна оваа недела подетално за мојата одлука“, рече тој.
Од Украина, претседателот Володимир Зеленски му се заблагодари на Бајден за неговата „непоколеблива поддршка“ во последните две години од руската инвазија.
„Секогаш ќе бидеме благодарни на лидерството на претседателот Бајден“, рече тој, додавајќи: „Ја почитуваме денешната тешка, но силна одлука“.
САД, под Бајден, беа главниот финансиски и воен поддржувач на Украина, а во двете земји постои загриженост дека поддршката може да престане доколку Доналд Трамп победи на претседателските избори во ноември.
Германскиот канцелар Олаф Шолц го нарече Бајден како „мој пријател“, додавајќи: „Благодарение на него, трансатлантската соработка е блиска, НАТО е силен, а САД се добар и доверлив партнер за нас. Неговата одлука да не се кандидира повторно заслужува признание. ”
Полскиот премиер Доналд Туск го пофали Бајден за неговите „тешки одлуки“, кои според него ги направиле „Полска, Америка и светот побезбедни“.
Тој, исто така, рече дека одлуката да се откаже од претседателската трка е веројатно „најтешката“ одлука што требаше да ја донесе Бајден.
„Сето мое восхитување и признание за храбрата и достоинствена одлука на претседателот“, рече шпанскиот премиер Педро Санчез.
„Голем гест од голем претседател кој секогаш се борел за демократија и слобода“, рече тој.
Премиерот на Обединетото Кралство Кир Стармер рече: „Ја почитувам одлуката на претседателот Бајден и со нетрпение очекувам да работиме заедно во текот на преостанатиот дел од неговото претседателствување“.
Стармер додаде дека знаел дека Бајден „донел одлука врз основа на она што тој верува дека е најдобро за американскиот народ“.
Извор: Еуроњус
Подготви: А. В.