Градот Скопје започнува голем инвестициски проект за реконструкција на инфраструктурата на средните училшта во Скопје за што се определени 90 милиони денари, а целта е подобрување на условите за учење. Тринаесет од вкупно 23 средни училишта, до почетокот на новата учебна година ќе добијат нови фасади, а на останатите ќе се доработа. Во сите училишта се предвидува и облагородување и обновување на зеленилото во дворовите.
Како што истакна на денешната прес-конференција градоначалникот на Град Скопје, Петре Шилегов активностите опфаќаат реконструкција на фасади, на училишни згради, фискултурни сали, како и адаптација на просторот на лица со физичка попреченост. Појасни дека ќе бидат реконструирани фасадите на оние средни училишта каде има потреба од тоа, со што тие ќе бидат енергетски ефикасни во согласнст со современите стандарди за рационализација и ќе се овозможи заштеда на електрична и топлинска енергија.
– Висината на средствата за оваа намена предвидена во буџетот на Град Скопје изнесува 70 милиони денари. Овие средства ги обезбедивме со пренамена на средствата кои беа предвидени за Скопје 2014. Наместо прескапи барокни згради во центарот, Скопје ќе добие енергетски ефикасни училишта и долгорочно ќе заврши едно крупно прашање од образованието, рече Шилегов.
Дополнително, предвидени се уште 20 милиони денари средства обезбедени од редовната програма на градот кои ќе бидат наменети за доопременување на училштата и решавање на внатрешната инфраструктура согласно приоритетите на секое училиште. Со проектот предвидени се реконструктивни активности за адаптација на просторот за пристапност со физичка попреченост при што ќе бидат изградени надворешни и внатрешни рампи во училиштата каде недостасуваат, како и адаптација на тоалетите во сите средни училишта во градот. Со ова, како што исткана Шилегов, се обезбедува еднаков пристап за сите, а учениците со телесна попреченост ќе добијат пристап до секое средно училиште во градот.
– Нашите деца заслужуваат да учат во подобри услови, планираме тие услови да ги добијат со почетокот на новата учебна година. Во овогодинешниот буџет на Град Скопје за образование е дуплиран во однос на лани, односно од 81,2 милиони деанраи на 163,2 милиони денари, токму заради тоа за нашите деца да им овозможиме квалитетно образование и развој, рече Шилегов.
На новинарско прашање, градоначалникот на Скопје истакна дека во моментов во четири средни училишта во градот сеуште за греење се користи мазут, а ќе се работи, тоа да се замени со еколошки поприфатливи енергенси, како што е гасот или нивно приклучување на топлинска енергија.