Македонските тенисерки загубија од Косово со 1:2 во второто коло на турнирот од Евроафриканската група број 3 во Хелсинки. Победникот беше решен по мечевите во поединечна конкуренција, па дуелот во двојки беше шанса за настап на целокупната репрезентација.
Магдалена Стоилковска го положи оружјето пред Доника Башота по час и 54 минути игра. Косовската репрезентативка на крајот се радуваше на победата со 6:2, 3:6, 7:5. Израмнување не донесе ниту Лина Ѓорческа во вториот меч. Арлинда Рушити (780 место на ВТА листата) ја изненади најдобрата македонска тенисерка и 389. на светското рангирање со 6:1, 3:6, 6:2 во натпревар што траеше час и 32 минути.
Единствениот поен за „црвено-жолтите“ девојки го освоија Ана Ристевска и Александра Симева кои славеа над косовската комбинација Веса Ѓинај и Блерта Укехаџај со 6:4, 6:1.
Утре (среда) е слободен ден на тенискиот турниот во финскиот главен град. Македонската репрезентација во четврток ќе игра против Алжир, а во петок и против Кипар во последното коло во групата Б. Во првото коло, избраничките на Димитар Лабудовиќ забележаа максимален триумф над Конго со 3:0.