Фејсбук идентификуваше и забрани стотици лажни профили, групи и страници што се вклучени во кампањата за координирано политичко влијание и имаат за цел влијание врз политика.
Компанијата соопшти дека се избришани 652 страници, групи и профили што се поврзани со Иран и со Русија поради „координирано неавтентично однесување“ што подразбира споделување политички материјал.
Твитер исто така објави дека избришал 284 профили поради „координирани манипулации“ од кои многу очигледно се од Иран.
Вакви профили има и во Македонија. Тајм.мк најпопуларниот генератор на вести кај нас, кој подолго време ја промовира македонската верзија на Твитер, преку ранг листа на најпопуларни твитови во текот на денот, најави дека преку софтвер ќе ги „филтрира“ оние профили кои преку организирани активности, создаваат вештачка влијателност на одредени профили.
Анализата што направиле за еден месец сообраќај на Твитер покажала дека неколку профили имаат голема (нереална) достапност до публиката и тоа не е врз основа на содржината на пораката, туку од бројот на тие кои ја шират, односно го ретвитаат твитот. Тие се поврзани во мрежа, која функционира врз база на меѓусебно ширење на пораките. Ваквиот систем може да се користи и за политичка пропаганда.
Ваквите организирани пропаганди, создаваат привид дека поддршката за некој политичар или за одредна опција е поголема отколку што е фактичката или со маса твитови ги маргинализираат аргументите на другата страна. Целта е да извршат влијание врз ставот на јавноста во спорни прашања или да собираат гласови на избори.