Фејсбук објави дека воведува промена во однос на она што ќе се појавува кај корисниците како News Feed. СО ова, како што се истакнува, ќе се даде приоритет на мислења од пријателите, членовите на семејството и групите пред мислењата од компаниите.
Компанијата сака да ги поттикне интеракциите помеѓу пријателите, а истовремено да го намали појавувањето на видеа, вести и бизнис постови кои корисниците ги конзумираат пасивно – без коментирање и споделување.
Сопственикот на Фејсбук Марк Цукерберг на ФБ профилот напиша дека промената е резултат на истражувањата кои покажуваат дека корисниците се најзадоволни кога комуницираат со пријателите и семејството наместо со “пасивно читање статии или гледање видеа”.
-Ова значи дека ќе гледате помалку јавни содржини, како мислења од компании, брендови и медиуми, напиша Цукерберг.
Со повеќе од две милијарди месечни корисници, секоја промена што Фејсбук ја прави може да предизвика „сеизмички потрес“. Овој потег, особено, ќе ги погоди оние издавачи и брендови кои се потпираат на социјалната мрежа за да дистрибуираат и промовираат содржини.
Според првите луѓе на Фејсбук социјалната мрежа и натаму ќе објавува маркетинг содржини, но притисокот ќе биде на издавачите и на брендовите да создаваат содржини што иницираат интеракција, доколку сакаат да ги подобрат своите шанси да се појават на News Feed.
Цукерберг претходно овој месец изјави дека неговата лична цел за 2018 година ќе биде да се фокусира на “решавањето” на многу од овие егзистенцијални прашања, вклучително и “осигурувајќи дека времето поминато на Фејсбук е добро потрошено време”.
Истото ова Цукерберг го повтори и во својот пост вчера.
-Со овие промени, очекувам времето што луѓето го поминуваат на Фејсбук да опадне. Но, исто така, очекувам дека времето што ќе го потрошите на Фејсбук ќе биде повредно, напиша Цукерберг.
Со промената всушност ќе се прикажува повеќе од она што го споделуваат нашите пријатели, отколку компаниите или огласувачите кои ги следиме.