Фејзи Азири, еден од обвинетите во случајот „Монструм“, е вратен во затворот во Штип за издржување на затворската казна за нелегално поседување на оружје.
Од Кривичниот суд во Скопје денеска соопштија дека ја одбиле молбата на Азири да му биде продолжен прекинот од издржување на казната.
„Kривичниот совет на одделот кривично полнолетни, при Основниот суд Скопје 1 – Скопје, постапувајќи по жалба на осудениот Ф.А. изјавенa против решение на судија за извршување санкции со кое се одбива молбата за продолжување на прекинот од издржување на казната затвор, советот донесе решение со кое жалбата на обвинетиот се одбива како неоснована“, стои во соопштението од судот.
Азири, како што пренесува „ТВ 24“ повикувајќи се на затворската управа, со полициско обезбедување околу 13.30 часот бил спроведен во затворот.
Неделава медиумите обелоденија дека Азири речиси два месеца бил во бегство од штипскиот затвор. Тој бил пуштен на отсуство, но кога периодот што му бил даден завршил, Азири не се вратил во затворот.
Штипскиот затвор уште на 28 февруари го известил Судот и Управата за санкции дека Азири е во бегство, но неговото апсење се случи месец и пол подоцна откако во јавноста излезе информација дека него ниту некој го барал, ниту пак Судот и Управата за санкции знаеле каде е.
Каде е Азири се дозна во вторникот неделава, откако поради негово отсуство беше одложено рочиштето за случајот „Монструм“, а неговите адвокати до судот доставија медицинска документација дека тој бил на лекување на Клиниката за пулмологија.
Тој, истата вечер беше уапсен на Клиниката и ставен под полициски надзор.
На рочиштето за „Монструм“, Горан Наќевски, татко на Александар Наќевски, едно од убиени момчиња кај Смилковско езеро во 2012 година, обраќајќи се пред судот рече дека премиерот Зоран Заев, како тогашен опозиционер им покажал транскрипт и прислушуван разговор меѓу функционерот на ДУИ, Невзат Бејта и Фејзи Азири.
Мајката на Александар, Зорица Наќевска прочита и транскрипт од разговор кој наводно се водел помеѓу обвинетиот Азири и едно непознато лица.
Братот на обвинетот Фејзи Азири, Бејди Ајдари кој беше присутен во судот, тврди дека неговиот брат е невин и дека разговорот со Невзат Бејта од ДУИ е од приватен карактер.
Невзат Бејта одби да ги коментира наводите изнесени на денешното рочиште.