Светски познатиот музички фестивал EXIT е прогласен за шампион на регионалната соработка на Западен Балкан за 2017 г. од Регионалниот совет за соработка (РСС), што синоќа во Сараево ја одбележа десетгодишнината од својата работа.
Наградата му е врачена на основачот на EXIT Душан Ковачевиќ од генералниот секретар на РСС Горан Свилановиќ, кој истакна дека „фестифалот со универзални музички содржини ги надминува културолошките, политичките и сите други разлики и ни нуди ново време и прозор кон светот на иднината во духот на толеранцијата, разбирањето и просперитетот, на што сите треба да се угледаме“.
Фестивалот EXIT од секогаш беше повеќе од музички фестивал, формиран е како активистичко движење за слобода и мир на Балканот, со цел да ги собере и помири младите од целиот регион, изјави Ковачевиќ, заблагодарувајќи се на РСС што ја препознал таа страна од фестивалот.
РСС е меѓувладино оперативно тело на земјите членки од Процесот за соработка во Југоисточна Европа (SEECP), чиј основач и полноправен учесник е и Република Македонија. Ова тело со седиште во Сараево е формирано во 2008 во Софија и е наследник на поранешниот Пакт за стабилност.
Во 2013 година ја донесе Стратегијата ЈИЕ 2020, а од мината година со усвојувањето на Повеќегодишниот акционен план за земјите од Западен Балкан на самитот во Трст, Советот е одговорен заедно со Европската комисија за унапредување на соработката со владите од регионот и изградба на единствен економски простор, како дел од претпристапниот процес за зачленување во Европската унија.