Себастијан Фетел се спаси од дополнителна санкција за инцидентот со Луис Хамилтон за време на ГН на Азербејџан што се возеше на 25 јуни во Баку во рамки на Формула 1 шампионатот. Интернационалната автомобилистичка федерација (ФИА) прогледа низ прсти и реши да не презема дополнителни мерки и да остане на десетте казнени секунди што Германецот ги доби за намерниот судир со болидот на Британецот додека безбедносното возило сè уште беше на патеката.
Пилотот на Ферари, пак, го обвини колегата од Мерцедес за намерно кочење и тестирање на сопирачките на него. Но, податоците од болидот на Хамилтон, сепак, не укажуваат на негово невообичаено однесување.
Во соопштението на ФИА се наведува дека „прифаќањето на целосната одговорност на Фетел за настанот и искреното извинување до Федерацијата и светското автомобилистичко семејство“ се земаат како олеснителна околност за „помилувањето“. Четирикратниот светски првак јавно се извини за стореното дело и прифати да учествува во серија едукативни активности во текот на сезоната.
Германецот, меѓутоа, доби предупредување дека ќе заврши пред Меѓународниот суд на ФИА во случај на повторување на таквото однесување. Хамилтон за време на трката и по неа изрази незадоволство од казната од 10 секунди и делото на Фетел го нарече „одвратно“, „срамно“ и „опасно“.
Лидер во генералниот пласман е Фетел кој по ова ќе остане на плус 14 бода од Хамилтон. Наредната трка во Формула 1 сезоната ќе се вози за ГН на Австрија на 9 јули.