Претседателот на СДСМ, Венко Филипче, денес остро реагираше на обидот на премиерот Христијан Мицкоски да ја искористи трагедијата во Трубарево за, како што рече, „пи-ар драмолетка со хибриден напад“.
Ниту еден премиер досега не се осмелил вака неосновано да манипулира со теми од безбедносната сфера. Да вовлекува странски центри на моќ, хибридни сценарија, а да не преземе буквално ништо институционално – тоа е не само несериозно, туку и крајно опасно,“- предупреди Филипче.
Според него, ако навистина постоеше закана од странски сили, Владата имала обврска веднаш да го свика Советот за безбедност, да го алармира НАТО, да ја мобилизира Армијата и безбедносните служби. „Ништо од тоа не видовме. Наместо реакција, гледаме само сценарио за одвлекување на вниманието од реалниот проблем – хаосот во институциите и потполната неспособност да се справат со последиците од пожарот во Трубарево,“рече тој.
Филипче укажа дека ваквото однесување е доказ за дилетантско водење на државата. „Секојпат кога ќе има проблем, вината се префрла на замислени непријатели. Еднаш се дронови, другпат странски служби, трети пат хибридни напади. А граѓаните се оставени сами, без информации, без заштита, без надеж,- изјави тој.
Ова не е прв пат премиерот Мицкоски да посегне по безбедносна терминологија за дневнополитичка корист. Но, како што предупредуваат експертите, злоупотребата на државните институции во служба на пи-арот, претставува длабоко поткопување на довербата во системот и дополнителна дестабилизација на општеството.
Ако веќе владата нема решенија, барем нека престане да создава лажни приказни. Државата не е театар, а народот не е публика за евтини политички претстави,“ заклучи Филипче.