Во моментот се тестираат седум нови лица на коронавирусот, останатите 18 пациенти немаат промена на состојбата од вчера, а првата заразена пациентка кај која беше дијагностицирана болеста ќе биде пуштена на домашно лекување, истакна министерот за здравство, Венко Филипче на пладнената прес-конференција од Владата.
„Тројца од лицата со симптоми на грип доаѓат од Дебар, двајца преку Центарот за јавно здравје од Штип и уште двајца со анамнеза дека изминатиот период патувале во Австрија, односно, Германија се наоѓаат на Инфективната клиника во Скопје. Нивните резултатите ќе бидат познати во текот на денот. Непроменета е состојбата а сите други 18 пациенти, 13. на Инфективната клиника во Скопје и сосема добра на пациентите на домашно лекување во Дебар, како и на пациентката која е на респираторна машина и стабилна е. Денеска е испишана првата пациентка во сосема добра клиничка состојба, контролата на белите дробови покажа дека нема големи последици и може да се упати на домашно лекување. Тестирани се сите кои биле во контакт со неа и немаат никакви симптоми и тие се практично здрави“, истакна Филипче.
Министерот рече дека е во постојан контакт со професорот од Инфективната клиника кој во болницата во Дебар за координација на локалните епидемиолози и притоа најави една форма на тестирања на повеќе луѓе како скрининг, согласно светските искуства од некои земји, па дури и на луѓе за кои не е сигурно дека биле во контакт со заболени.
„Очекуваме во текот на денот или утре да пристигнат меѓу 40 и 80 лица со цел детално да се скенира тој регион“, рече Филипче и додаде дека координацијата на лекарските служби е добра и нема никаков проблем во тамошната болница.
Претпладнево за првпат се состана и Кризниот штаб на ниво на Владата на кој претставници на секој од ресорите ја кажа состојбата и објасни како се спроведуваат мерките на терен.
„Кризната состојба во Дебар и Центар Жупа се спроведува добро. Сите органи и тела функционираат добро и координирано. Нема некој проблем, луѓето се мирни, комплетно сфаќаат што се случува и се придржуваат до мерките. Немало никакво нарушување на јавниот ред и мир и луѓето во тој регион покажуваат исклучително висок степен на дисциплина и придржување до мерките“, потенцира министерот за здравство.
Тој повтори дека излез од територијата на двете општини е дозволен само за луѓето на кои е индицирано болничко лекување и тоа со специјална дозвола од болницата во Дебар. За 19 часот информира дека ќе има седница на Владата на која ќе се дискутира за повеќе мерки, а попладнево (16 ч.) е закажан и Советот за национална безбедност кај претседателот Стево Пендаровски.
Клиниката за психијатрија, посочи Филипче, започнува со телефонско-психолошка поддршка на граѓани и ранливи групи за што дополнително ќе бидат објавени и броевите за контакт и тоа за психолошка поддршка на родители на деца од предучилишна и училишна возраст, психолошка поддршка на возрасни лица во самоизолација и психолошка поддршка на граѓаните на Дебар и Центар Жупа.
Филипче истакна и дел од заклучоците на утринскиот состанок на Комисијата за заразни болести и најави ослободување од работа на еден родител на децата со цистична фиброза што се наметна како прашање во изминатите денови. Подготвен е списокот на лекари, анестзиолози и медицински сестри кои ќе ротираат во институциите во кои ќе биде потребно. За тоа, како што истакна министерот, на располагање се 440 медицински сестри и 200 анестезиолози од целата држава, а откажана е хроничната програма во сите хируршки одделенија.