Министерот за здравство Венко Филипче најави дека на утрешниот Совет за безбедност ќе биде побарано продолжување на вонредната состојба, но не прецизира за колкав период.
„Утре треба да се одржи состанок на Советот за безбедност. Ние ќе побараме продолжување на вонредната состојба од повеќе причини за да имаме механизми во однос на имплемантацијата на вакви препораки и во периодот кој што следи“, рече Филипче одговарајќи на новинарско прашање на денешната прес-конференција.
Тој не прецизираше дали ќе биде побарано продолжување на вонредната состојба за нови 30 денови или помалку.
„Потребно ни е да се продолжи вонредната состојба затоа што дел од мерките важат само за време на вонредна состојба. Многу е битно тие да важат и натаму. Многу е битно да имаме инструменти во рацете да работиме со овие механизми, во однос на рестрикција на движење, уредбите кои важат и така натаму. Потребни ни се инструменти со кои препораките на Комисијата за заразни болести ќе можат да се имплементираат преку Владата“, рече Филипче.
Во спротивно, вонредната состојба поради коронавирусот, која првично беше прогласена на 18 март, по што беше донесена уште една одлука за нови 30 дена, ќе заврши в сабота. Двете одлуки на претседателот Пендаровски за прогласување вонредна состојба останаа непотврдени од Собранието, поради тоа што тоа беше распуштено.
Ако парламентарниот состав не беше распуштен Собранието, наместо претседателот Пендаровски ќе требаше да ги донесе одлуките за прогласување вонредна состојба, како што е предвидено со Уставот.
Двете одлуки на шефот на државата за вонредна состојба беа разгледувани пред Уставниот суд, но тој реши дека нема основа за поведување постапка за оценување на нивната уставноста и законитост.
Што се однесува до хроничните болни, Филипче изјави дека се уште важи тоа дека хроничните пациенти не одат на работа. Тој нагласи дека денес се регрутирани вработени од градинките за тестирање, а тој процес ќе продолжи и во наредните детина дена.
“Се додека не сме се сигурни дека се сите тестирани градинките нема да се отворатат. Секако дека е ризик, некој после тоа да се зарази, но ќе се направи епидемиолошка анкета, некои може и дома да имаат носители и тој ризик постои и откога ќе се отворат градинките и сметам дека од тука треба да се почне. На овој начин ќе се откријат асимптоматските ностители во моментот“, изјави Филипче.