Министерот за здравство Венко Филипче не може да прецизира кога би биле отвориле градинките, но како што вели, тоа сигурно нема да биде во скоро време, поради порастот на бројот на заболени.

„Тешко е сега да кажеме тајминг кога би се отвориле градинките, меѓутоа засега сигурно не“, рече Филипче по посетата на Институтот за белодробни заболувања кај децата во Козле во кој сега се примаат пациенти со КОВИД-19.

Тој потенцира дека одлука да се направи скрининг на вработените била донесена во период кога состојбата со коронавиусот дозволувала да се размислува за отворање на градинките.

„Во моментот кога беше одлучено да се прави скрининг на вработените во градинките, состојбата беше таква што тие можеа да се отворат и поради тоа беше направен. Но, со зголемување на бројот на новодијагностицирани случаи сега во овој момент не е време да се отворат градинките, заради тоа што децата апсолутно се големи трансмитери на вирусот кон членови на своите семејства“, рече министерот за здравство.