Засега, нема да има рестрикции за влез и излез од Македонија
Почнувајќи од понеделник граѓаните освен сертификат за вакцинација, или потврда за примена една доза вакцина, во угостителски објекти и на други локации опфатени со мерките, ќе може да влезат и со потврда за прележан ковид, но само првите 45 дена, сметајќи од денот кога оздравеле. Засега, нема да има рестрикции за влез и излез од Македонија, но дополнително ќе се разгледува и тоа прашање, изјави денеска министерот за здравство, Венко Филипче, по посетата на охридската болница.
Тој појасни за корегираните мерки кои ќе почнат да важат од понеделник, 16 август.
– Тој период е за да поминат неопходните 30 дена по оздравувањето, 15-тина дена да се организира вакцинацијата. Единствено решение е да се зголеми опфатот со вакцинација, верувам граѓаните ја разбраа пораката за мерките и сакам да им се заблагодарам. Ако граѓаните имаат дилема сакам да ги охрабрам да одат да се вакцинираат, тоа е начинот со којшто ќе постигнеме колективен имунитет, ќе имаме нормален живот, ќе може да функционираме, да живееме, да работиме, да бидеме продуктивни и да ги вратиме назад нашите животи. Доказ за тоа е дека популацијата на вакцинирани граѓани, заболува во исклучително мал процент, изјави Филипче.
По завршувањето на првите 45 дена, од прележувањето, и за овие граѓани ќе важи дека за влез во објекти треба да приложат серитификат за вакцинација, односно потврда за примена барем прва доза вакцина.