Филипинскиот претседател Родриго Дутерте се закани дека невакцинираните луѓе ќе бидат приведени доколку не ја послушаат наредбата да останат дома, откако во државата е потврден најголем број на заразени со коронавирусот во изминатите три месеци.
Во телевизиското обраќање до нацијата, Дутерте рече дека ќе побара од водачите на заедницата да бараат невакцинирани луѓе и да се погрижат да не ги напуштаат своите домови.
Ако ја напушти куќата и се движи низ заедницата, дозволено е да биде запрен. Ако се спротиставува, капетанот сега е овластен да апси непослушни лица, рече Дутерте.
Дневните инфекции со коронавирус на Филипините се највисоки од 26 септември и вчера беа пријавени 17.220 нови случаи, соопшти Министерството за здравство, вклучително и оние предизвикани од сојот омикрон, што е трипати повеќе од вторникот. Вкупниот број на инфекции е над 2,88 милиони и има повеќе од 51.700 смртни случаи, а Филипини се втора земја по бројот на заразени и починати од ковид-19 во Југоисточна Азија по Индонезија.
„Јас сум одговорен за безбедноста и благосостојбата на секој Филипинец“, нагласи Дутерте.