Случајот „Рекет“ влегува во финална фаза. За денеска е закажано рочиште за завршните зборови на Обвинителството и на одбраната по што ќе следува и изрекување на пресуда на судечкиот совет под водство на судијката Васка Николовска Масевска.
На последните рочишта за овој судски предмет своја одбрана даде второобвинетата во случајот, Катица Јанева, (поранешна обвинителка на СЈО), која ги отфрли обвиненијата против неа и истакна дека законски ја вршела својата работа додека било на чело на Специјалното обвинителство.
Првообвинет Бојан Јовановски – Боки 13 се товари дека влијаел кај Јанева за бизнисменот Јордан Камчев, осомничен во предметот „Империја”, да добие поблаги мерки во истражната постапка за што во обвинителниот акт се товари дека земал 1,5 милиони евра.
Меѓу обвинетите за овој предмет каде прв пат во историја на државата во обвинение е опфатен еден обвинител беше и Зоран Милевски – Кичеец, но уште на првото рочиште тој ја прифати вината и Кривичниот суд го осуди на три години затвор (неправосилна одлука).
Случајот „Рекет“ почна на 3 декември лани и оттогаш во улога на сведоци во Кривичниот суд Скопје се појавија бизнисмени, соработници на обвинетите, обвинители во СЈО и блиски луѓе на Јовановски кој смета дека процесот е монтиран, Јанева ги негираше обвинувањата, додека за обвинителката Вилма Русковска не постоеше дилема дека парите завршиле кај Боки-13.