Ватерполо репрезентацијата на Србија е освојувач на Светската лига за 2019 година. Во финалето во базенот на СЦ „Ташмајдан“ во Белград, српските ватерполисти ја поразија Хрватска со 12:11 (по четвртини: 1:3, 5:2, 1:3, 5:3) со што воедно значи и пласман на Олимписките игри во Токио во 2020 година. За успехот се наградени и со вредносен чек на 100.000 американски долари.
Мечот за титулата беше прекинат во последната четвртина поради обилните врнежи од дожд во Белград што резултираа и со затајување на семафорот. Но, набргу потоа финалето продолжи, а завршната минута донесе вистинска драма.
Хрватска израмни на 11:11 за веќе во наредниот напад да биде досуден петерец за домашната селекција што во гол го претвори Филип Филиповиќ на 17 секунди до крајот. Домашните ватерполисти го одбранија последниот атак на противникот и заслужено се радуваа на крајот.
По четири погодоци за победничката репрезентација постигнаа Филиповиќ и Мандиќ, прв стрелец меѓу поразените беше Вукичевиќ со шет гола.
Хрватските медиуми известуваат за фер и коректна атмосфера во финалето пришто го нотираат и аплаузот од трибините по интонирање на нивната химна.
Бронзениот медал го освои селекцијата на Австралија која во малото финале ја порази Шпанија со 11:10 (по четвртини: 3:1, 2:3, 4:4, 2:2).