Управата за финансиска полиција поднесе кривична пријава до Основното Јавно Обвинителство против Лила Стојановска поради постоење основи за сомневање за сторено кривично дело „даночно затајување“. Таа, како што стои во соопштението на финансиската полиција, во својство на физичко лице во периодот од 21 јуни во 2017 година до 7 јули 2017 година, на личната банкарска сметка, во три наврати примила парични средства во вкупен износ од 16.095.600 милиони денари, по основ на склучен Договор за изготвување на „Проект за Интернационална асоцијација за заштита на човековите права“ со Друштвото ИЗГРАДБА ИНЖЕНЕРИНГ ДАН-МАК Скопје и лицата Е.Н. и Д.Н..
„До Управата за финансиска полиција доставена е Пријава од Друштвото ИЗГРАДБА ИНЖЕНЕРИНГ ДАН-МАК и лицата Е.Н. и Д.Н. во која е изнесено сомнение за сторени кривични дела, со лажно прикажување на факти, против пријавената Л.С. на која и уплатиле вкупно 16.095.600 милиони денари. Притоа е склучен и нотарски е заверен Договор за уредување на меѓусебни обврски ОДУ бр. 399/17 помеѓу пријавеното лице Л.С. и пријавителите, за изготвување на „Проект за интернационална асоцијација за заштита на човекови права“, со цел обезбедување средства и со ветување дека за проектот на правното лице ИЗГРАДБА ИНЖЕНЕРИНГ ДАН-МАК ДООЕЛ Скопје, пријавената Л.С. наводно ќе му обезбеди донации од 3.580.000 евра“, е наведено во дописот на Финансиската полиција до медиумите.
Како што информира Финансиската полиција, расположивите парични средства како остварен приход, Лила Стојановска ги подигнала во целост и во готово за себе лично, при што без да ги пријави во Годишната даночна пријава за 2017 година до Управата за јавни приходи, не пресметала и не уплатила персонален данок на доход во висина од 1.788.398 денари, за кој го оштетила Буџетот на Република Северна Македонија.