Финска може да донесе одлука дали да се приклучи на НАТО за само неколку недели а одлуката е можна „во текот на оваа пролет“. Одлуката ќе се забрза по сцените од воените злосторства од Украина, кои вчера го обиколија светот. Земјата може да се приклучи на трансатлантскиот воен сојуз и покрај предупредувањата за одмазда и „воените и политичките последици“ од Кремљ.
Премиерката Сана Марин рече дека „и приклучувањето кон НАТО и неприклучувањето се избори што имаат последици“. „Треба да ги процениме и краткорочните и долгорочните ефекти. Во исто време, мора да ја имаме на ум нашата цел: обезбедување на безбедноста на Финска и Финците во сите ситуации“, рече премиерката Марин.
Марин додаде дека односите на Финска со соседна Русија се промениле неповратно по нападот врз Украина и „потребно е многу време и работа за да се врати довербата“.
Финска дели 1.340 километри граница со Русија, најдолга од која било членка на Европската унија. Земјата остана воено неврзана од крајот на Студената војна поради страв да не ја испровоцира Москва.
Викендов, министерот за надворешни работи на Финска, Пека Хависто, рече дека руските дејствија во Украина „целосно го сменија безбедносниот пејзаж во Финска“. Тој изјави за „Кјодо њуз“ дека Финска мора да биде подготвена за „понегативни воени сценарија“.
Ова доаѓа и покрај навестувањата за одмазда од Москва доколку земјата влезе во НАТО. Минатиот месец руски политичар предупреди на „сериозни воени и политички последици“ доколку Финска и Шведска се приклучат на Алијансата.