Тројцата преживеани фудбалери на Шапекоенсе беа централни фигури во емотивниот прв официјален натпревар на бразилската екипа по страшната авионска несреќа во Колумбија. На стадионот во Шапеко на кој се собраа 20.000 гледачи гостуваше шампионот Палмеираш, а голманот Џексон Фолман, дефанзивецот Нето и играчот за врска, Алан Рушел го подигнаа пехарот во Копа Судамерикана пред мечот што заврши 2:2. Членовите на семејствата на настраданите фудбалери добија медали, а мечот на натпреварот го најави преживеаниот новинар Рафаел Хензел.
Џексон Фолман имаше емотивно обраќање пред присутните за несреќата на 28 ноември во околината на Меделин во која животот го загубија 71 лице.
„Се сеќавам кога почна се, кога се исклучија светлата во авионот. Беше лесно да се заклучи дека нешто не е во ред. Авионот впрочем не почна да паѓа туку се лизгаше низ воздухот. На ударот на земјата не се сеќавам бидејќи се онесвестив. Се сеќавам кога се разбудив, кога ги отворив очите. Беше студено и мрачно. Целиот се тресев и викав колку што ме држеше гласот „помош, помош, не сакам да умрам“. Слушав викања и од пријатели кои сè уште беа живи. Слушнав и кога доаѓаа спасувачите, рекоа дека се полицајци“, рече 24 годишниот Фолман, еден од шестемина преживеани во падот на авионот на боливиската компанија „Ламиа“, кој мораше да ја заврши кариерата по ампутацијата на десната нога до потколеницата.