Американскиот претседател Доналд Трамп во средата во Белата куќа ги прими учениците кои беа сведоци на неколку масакри во училишта, коишто изминатите денови, по последниот таков напад во Флорида, гласно го критикуваа поради неговата поддршка на либералните закони за поседување оружје.
И покрај тоа што Трамп на таа средба ги вчудоневиди со предлогот, и наставниците да носат оружје, наместо да се намали присуството на оружјето во училиштата, јавноста беше непријатно изненадена и според коментарите, разочарана од она што го виде на една од фотографиите од таа средба.
На фотографијата на “Getty Images”, претседателот држи парче хартија со белешки за пет точки за дискусија напишани со црн маркер. Или како што медиумите го споредија со „ливче за препишување“.
Она што може да се види од делот што Трамп не го покрива со рацете е дека советниците буквално му напишале се што треба да каже, од прашање како: Што најмногу би сакале да ми кажете за вашето искуство? Што можеме да сториме за да ви помогнеме да се чувствувате безбедно?, до последото видливо на хартијата: „Ве слушам”.
Токму ова последното предизвика најмногу реакции во јавноста и на социјалните мрежи, доведувајќи ја во прашање веродостојноста на неговите реакции: „Дали му се потребни вакви „потсетувања“ за да покаже загриженост?