Поттикнати од како што велат, неуспешната организација и нејасни стратешки цели, членови и основачи на партијата Левица денеска најавија дека ќе формираат внатрешна фракција под името „Единство“, чија цел, велат тие, е да се обедини членството и партијата да се врати на вистинскиот пат.
„Изминатата година Левица покажа храброст, знаење, желба за промени, но не и политичка зрелост и мудрост. Не беше донесен стратешки план, туку беа исполнувани желбите на одредени лидери. За да се оствари тоа беше прекршен Статутот на партијата и беа употребени лаги и манипулации со членството. Беа искажани закани за бркање од партијата и дисциплински постапки. Ние не ја формиравме Левица за да формираме нови диктатори, туку за да формираме нови лидери“, изјави денеска Маријан Ненов, еден од основачите на партијата.
За предводникот на кандидатската листа на оваа нова партија во ИЕ 1, Димитар Апасиев, таквите фракции се во ред, бидејќи истите се предвидени како статурно право на членовите, дополнувајќи дека проблемот лежи во саботирањето на веќе донесените одлуки на партијата.
„Спорното е во тоа што се саботираат некои одлуки кои што се веќе донесени, тоа не е добро. Имено тоа подлежи на дисциплинска одговорност, така што статутарното делување подразбира почитување на одлуките на највисоките партиски органи, во случајов тоа е одлуката за самостојно учество на изборите“, вели Апасиев.
Помеѓу Ненов и Марјан Ристески, исто така основач на партијата, потенцирше дека опозицијата им понудила на Левица сигурни пратенички места, но преговорите биле отежнувани се со цел партијата самостојно да излезе на избори.
„Јас не учествував во преговорите но имавме состанок на кој ни кажаа дека имаме сигурни места во опозицискиот фронт. Некој тоа намерно не го кажуваше, зборуваат дека саботираме ние. Не е точно, апелираме и ги повикуваме јавно носителите на изборните единици да смогнат сили бидејќи рејтинзите покажуваат дека се под 0.3 отсто, да соберат храброст, да ги повикаат граѓаните и да се откажат од овие избори“, изјави Ристески, додавајќи дека на избори се оди со стратегија а не со полемизирања на социјалните мрежи.
Апасиев пак, кој е убеден дека Левица ќе влезе во следниот парламентарен состав, тврди дека преговори воопшто и немало, верувајќи дека најверојатно на членовите од фракцијата им се нуделе примамливи позиции по изборите.
„Ни прават контра услуга. Секојдневно пристапници се пополнуваат како никогаш досега, така што дури и негативниот публицитет нас ни носи гласови на овие избори“, потенцира Димитар Апасиев.
Немањето стратегија тој тотално го отфрла, сметајќи дека Левица придонесува за „пад на режимот“ преку неопределените гласачи, а тие очекуваат сигурни три пратеника во Собранието по изборите закажани на 11.декември.