Здружението Фронт за демократска Македонија (ФРОДЕМ) пред денешната седница на Централниот комитет на ВМРО-ДПМНЕ преку соопштение ги повика членовите на разумно и статутарно постапување. Од ФРОДЕМ велат дека набрзина закажаниот и нестатутарно одреден предлог-термин за вонреден конгрес е во прилог на криминализираните структури и непријателите на партијата.
Додаваат и дека желбата да се одржи брз вонреден конгрес замислен според теркот на досегашното раководство во заминување, уште еднаш ќе покаже дека партијата сѐ уште нема сили да се оттргне од прегратките на фамилијата.
„Со оставката на Груевски во оставка е и Извршниот комитет кој веќе нема право донесува никакви одлуки, па затоа ЦК треба да донесе одлука за одржување на вонреден конгрес на партијата согласно одредбите од Статутот (кој ќе се одржи во рок од 60 дена од донесувањето на одлуката). ЦК да усвои критериуми за демократски избор на делегати на вонредниот конгрес и да го утврди максималниот број на делегати, а по усвојување на одлуката за вонреден конгрес и усвојувањето на критериумите за избор и број на делегати, да се избере заедничко координативно тело составено од досегашни членови на ЦК и ИК кои не се осомничени и обвинети по ниту еден основ и од претставници на внатре партиските групации и асоцијации. До одржување на конгресот со партијата да раководи новоизбраното координативно тело кое ќе изготви нацрт измени и дополнувања на Статутот и ќе овозможи општинските и месните комитети на партијата демократски да изберат делегати за конгресот на кој ќе се избере нов лидер на партијата и новите органи и тела“, се некои од предлозите на ФРОДЕМ.
Од таму додаваат и дека до изборот на новото партиско раководство на ВМРО-ДПМНЕ, координативното тело треба да даде максимална заштита и поддршка на сите обвинети и осомничени партиски членови, да се залага да се почитува презумпцијата на невиност, да бара правично и фер судење на сите обвинети како и спречување на селективната правда.