Младата фудбалска селекција на Србија, еден од ривалите на Македонија на Европското првенство во Полска во 2017 година, остана без селектор. Томислав Сивиќ, како што пишуваат медиумите кај северниот сосед, се повлекува од фунцијата на негово барање што за голем дел од доброупатени во тамошните прилики е изненадувачка вест.
„Со тешко срце, чист образ и крената глава се разделувам со младата репрезентација. Благодарност со поранешното и сегашното раководство на Сојузот, соработниците во стручниот штаб и играчите. Мојата одлука е мотивирана од приватни причини“, е дел од изјавата на Сивиќ за медиумите во Србија.
Од Фудбалскиот сојуз на Србија (ФСС) потврдија дека договорот е раскинат и тоа на барање и по желба на Сивиќ.
„Сивиќ нè изненади со одлуката. Не очекував дека по успех каков е пласман на Европско првенство ќе поднесе оставка. Благодарност за сè што стори“, рече Горан Буњевчевиќ, задолжен за функционирање на спортскиот сектор во ФСС.
Владимир Петровиќ-Пижон, координатор во ФСС, не крие разочарување од одлуката на Сивиќ.
„Искрено, и мене ме изненади одлуката за напуштање на младата репрезентација. Тешко ми е поради ова. Верувам дека луѓето во Сојузот навреме че најдат адекватна замена“, рече Петровиќ.
Србија, Македонија, Шпанија и Португалија ќе играат во групата Б на Европското првенство во Полска за играчи до 21 година.