Фудбалската репрезентација на САД го декласира Хондурас со 6:0 во третото коло од квалификациите во зоната КОНКАКАФ и повторно е во игра за пласман на Светското првенство во Русија во 2018 година. Победникот во Сан Хозе беше решен по првите 30 минути по кои Американците имаа водство со 3:0 со головите на Себастијан Летгет, Мајкл Бредли и Клинт Демпси.
Голеадата во Северна Каролина продолжи и во воведот на второто полувреме со нови три гола во мрежата на гости. Во 46 минута реализира Иван Пулишиќ, а во 49 минута и во 54 минута Демпси комплетира хет-трик по кој домашната селекција како да се задоволи со убедливата предност и дигна „рачна“ до крај на средбата.
По двата пораза што резултираа со отказ на Јирген Клинсман, ова е прв триумф на САД во мундијалските квалификации, па тимот што го презеде Брус Арена е конкурентен за директен пласман во Русија.
Нов лидер во КОНКАКАФ зоната е Мексико по победата над Костарика со 2:0. Стрелци на стадионот „Ацтека“ беа Хавиер Ернандес алијас Чичарито во седмата минута и Николас Арохо во 45.
Домашната селекцијата славеше и во третиот меч во групата. Тринидад и Тобаго со 1:0 ја порази Панама. Погодокот за три бода беше дело на Молино во 37 минута.
Квалификациии за СП 2018
Зона КОНКАКАФ (Северна и Централна Америка и Карибите)
Резултати, 3 коло
САД – Хондурас 6:0
Мексико – Костарика 2:0
Тринидад и Тобаго – Панама 1:0
Табела: Мексико 7, Костарика 6, Панама 4, САД 3, Тринидад и Тобаго 3, Хондурас 3.
Идно коло (28 март): Хондурас – Костарика, Тринидад и Тобаго – Мексико, Панама – САД