И подмладената репрезентација на Германија беше доволна за триумф на фудбалскиот Куп на конфедерации во Русија. „Панцерите“ во финалето во Санкт Петербург за еден гол беа подобри од Чиле (1:0). Стрелец на единствениот погодок на стадионот „Крестовски“ беше Ларс Штиндл во 20 минута по асистенција на Тимо Вернер за прва титула во натпреварувањето што се одржува од 1992 година колку што имаат и Аргентина, Мексико и Данска. Франција има два освоени пехара, најтрофеен е Бразил со четири.
Воведиот период во мечот им припадна на Чилеанците, но како одминуваше времето Германците воспоставија рамнотежа и почнаа да истакнуваат амбиција за гол за што не чекаа премногу. Ја искористија првата шанса што дојде по комоција на Марсело Диаз, дефанзивец на „ла роха“, што ја казни играчот на Борусија Менхенгладбах и успеа да го матира Клаудио Браво.
Јужноамериканскиот титулар се обиде да возврати, по можност до паузата, создаваше прилики, се закануваше од секаде, трагаше по патот до мрежата на Тер Штеген и од игра и по прекини, но таквата цел остана без реализација. Таквата определба остави простор и за Германија да бара втор гол за што нејзините репрезентативци имаа неколку солидни ситуации меѓутоа резултатот остана непроменет.
Второто полувреме донесе, за нијанса, повнимателна игра и без дотолку возбудувања како што беше случај во воведното. Чиле демонстрира решителност да тргне на се или ништо, го засили притисокот на што германскиот состав одговори мудро и зрело, одолеа и се однесуваше како да настапува заедно со години, а не само три ипол недели и ја сочува предноста од 20 минута.
По финалето беа доделени и три индивидуални награди на Адидас. „Златната топка“ му припадна на Јулијан Дракслер, „златната копачка“ на Тимо Вернер, а Клаудио Браво ја доби „златната ракавица“.
Бронзата ја освои Португалија во триумфот во продолженија против Мексико со 2:1. Мексиканците поведоа со автоголот на Нето во 54 минута, израмни Пепе во првата од судиското продолжение, а Адриен Силва од пенал во 108 минута им донесе славје на „европските Бразилци“.
Чиле – Германија 0:1 (0:1)
Стадион: „Крестовски“ во Сакт Петербург. Гледачи: 57,268. Гл. судија: Милорад Мажиќ. Асистенти: Милован Ристиќ и Далибор Ѓурѓевиќ (сите тројца од Србија). Ж. картони: Браво, Видал, Санчез, Варгас, Хара (Чиле); Кимих, Руди, Џан (Германија). Стрелец: Штиндл 20′ за Германија.
Чиле (формација: 4-3-3): Браво – Босежур, Медел, Хара, Исла – Диаз (Валенсија 53′), Ернандез, Арангуиз (Сагал 81′) – Видал, Санчез, Варгас (Пуч 81′). Селектор: Хуан Антонио Пици.
Германија (фрмација: 3-4-3): Тер Штеген – Ридигер, Мустафи, Гинтер – Хектор, Руди, Штиндл, Кимих – Дракслер, Горецка (Силе 90’+2′), Вернер (Џан 79′). Селектор: Јоаким Лев.