Реал Мадрид и Јувентус на 3 јуни во Кардиф ќе играат во првото финале во историјата на Лигата на шампиони под затворен кров. Одлуката ја донесе Фудбалската асоцијација на Велс (ФАВ) од сигурносни причини и во координација со безбедносните власти по самоубиствениот бомбашки напад во понеделникот во Манчестер пришто загинаа 22 лица.
„По разговорите со сите засегнати страни, Фудбалската асоцијација на Велс како организатор на настанот, реши да го затвори кровот на Националниот стадион во Кардиф за финалето во Лигата на шампиони. Кровот ќе биде затворен и за двата официјални тренинга на екипи на 2 јуни. Конечната одлука ја темелевме на препораките на официјалните претставници од изминатите неколку недели“, истакнаа од ФАВ.
Од Европската фудбалска асоцијација (УЕФА) ја поздравија одлуката што е во координација со полицијата во Јужен Велс. Притоа истакнаа дека нејзин приоритет за финалето, но и за секој друг натпревар, е обезбедување на максимална сигурност на сите инволвирани страни, екипите, официјалните лица и гледачите.