По низата на експлозии во Дортмунд, поточно, во близина на стадионот „Вестфален“ и поместување на првиот четвртфинален дуел во Лигата на шампиони меѓу Борусија и Монако за утре (18,45 ч.) се искажува солидарност на домашната екипа и нејзините навивачи кон гостите од Франција.
Германскиот клуб преку „Твитер“ почна акција насловена како #bedforawayfans, а насочена за гостинските фанови кои допатуваа од Кнежевството за полесно да најдат место за непланираното преноќување во Дортмунд.
Гестот на клубот наиде на поддршка и меѓу фановите на „милионерите“ кои се нудат за помош, оставаат контакти и ги отвораат своите домови за противничките навивачи. Дел од хотелите ги отворија своите капацитети за бесплатно сместување на гостински симпатизери со влезница за натпреварот.
По веста за експлозиите во градот, навивачите на Монако почнаа да скандидаат „Дортмунд, Дортмунд“ во знак на солидаризирање што наиде на симпатии во домашната јавност и громогласен аплауз од трибините на „Вестфален“. Гестот на двата навивачки табора е за секоја почит и претставува повеќе од фудбал.