Најголемите ривали за шампионската титула во фудбалскиот шампионат на Македонија со победи во шестото коло од сезоната. Бранителот на тронот, Вардар со 2:1 ја порази Ренова додека лидерот на табелата, Шкедија го совлада Силекс со 5:0.
Скопските „црвено-црни“ се намачија за трите бода попладнево на стадионот „Борис Трајковски“. Ги сочуваа благодарение на прекрасниот погодок со волеј на Хуан Фелипе во 83 минута, откако Тигран Барсегјан им обезбеди водство во 26 минута што го анулира Емран Рамадани во финишот на првото полувреме.
Тетовци, пак, продолжуваат во одличен реаализаторски ритам што го наметнаа од почеток на првенството и остануваат единствени непоразени во конкуренцијата. Со пет гола му посакаа среќен пат на Силекс за Кратово од кои три потпиша Изаир Емини во 13 минута, во 27. и во 90. Во листата на стрелци се додадоа уште Ферхан Хасани во 69 минута и Бесарт Абдурахими во првата од судиското надополнување.
Честа на гостинските екипи ја одбрани Работнички со триумфот над Победа со 4:2 со пресврт во вториот дел. Прилепчани заминаа на одмор со 2:0 со головите на Благоја Гешоски во четвртата минута и Филип Најдовски во 30. Но, продолжението на натпреварот донесе и сосема поинаква слика на теренот. „Црвените“ од Градски парк одговорија со двојно повеќе постигнати погодоци одошто примија и заслужено ја прославија првата победа во сезоната. Двапати Кире Маркоски во 57 минута и во 83. и по еднаш Емир Сахити и Чарлс Џефри Чинеду во 89. реализираа за составот од Скопје.
Академија Пандев со 2:0 го совлада тимот на Пелистер кој од 53 минута играше без исклучениот Лукас Фереира Кардосо. Пет минути по црвениот картон, Зоран Балдовалиев ги поведе „академците“ во водство со удар од белата точка на кого се надоврза и Американецот Тревис Боуен во 82. за трета победа на дебитантот во прволигашкото друштво.
Шкупи со минимални 1:0 славеше над Скопје. Стрелец на единствениот погодок на Чаир беше Кристијан Стојкоски во 25 минута.
Шкендија е на врвот на табелата со 16 бода, пет повеќе од второпласираната Академија Пандев и шест во однос на Вардар кој има и меч помалку.
Прва лига – 6 коло
Вардар – Ренова 2:1
Шкендија – Силекс 5:0
Победа – Работнички 2:4
Шкупи – Скопје 1:0
Академија Пандев – Пелистер 2:0
Табела: Шкендија 16, Академија Пандев 11, Вардар 10 (-1), Шкупи 10, Пелистер 8, Силекс 6, Работнички 5, Ренова 5, Победа 5, Скопје 3.
Идно коло (24 септември): Пелистер – Вардар, Скопје – Шкендија, Работнички – Академија Пандев, Силекс – Победа, Ренова – Шкупи.