Фудбалските мечеви на меѓународната сцена се повеќе наликуваат на бојни полиња отколку на спортски претстави. По низата инциденти меѓу навивачки групи во Лигата на шампиони и во квалификациите за СП 2018 во петокот, најновиот доаѓа од Атина каде вечерва се претепани тројца фанови на репрезентацијата на БиХ која ѝ гостуваше на Грција.
Гостинските навивачи, според информациите на медиумите од БиХ, биле нападнати пред стадионот „Јоргос Караискакис“ во Пиреја. На двајца од нив им била пружена прва помош на лице место, а третиот со потешки повреди е префрлен во болница. Како што пишува порталот www.klix.ba, Грците најпрво почнале да скандираат „Косово е Србија“ по што тргнале во физичка пресметка со фановите на БиХ.