Србија е на нозе, на Хрватите им падна камен од срце, Исланѓаните испишаа нова страница во својата фудбалска историја. Српската репрезентација ја совлада Грузија со 1:0 за потврда на лидерската позиција во групата Д и враќање на мундијалската сцена по пауза од осум години. Стрелец на единствениот гол на стадионот „Рајко Митиќ“ (поранешна „Маракана“) беше Александар Пријовиќ во 74 минута, а последниот свиреж на полскиот арбитар Павел Гил беше дочекан со огномет во Белград за прослава на остварената мисија.
Ако Србите го слават Александар Пријовиќ, свој херој си имаат и Хрватите. Андреј Крамариќ е спасителот на „коцкестите“ кои славеа против Украина во Киев со 2:0 со двата гола на фудбалерот на Хофенхајм и како второпласирани во групата ќе играат бараж двомеч за место на мундијалот во Русија. Првиот го постигна во 62 минута, вториот во 70. за „вадење“ од непријатната состојба во која се доведе хрватскиот национален тим по ремито (1:1) со Финска во петокот во Риека.
Исланд беше хит на ланското Европско првенство во Франција, а се надева дека ќе биде и на претстојното Светско првенство во Русија. Исланѓаните во Рејкјавик го совладаа Косово со 2:0 и како победници во групата И за првпат во историјата ќе бидат дел од фудбалски мундијал. Сигурдсон во 40 минута и Гудмундсон во 68. беа творци на големиот успех на островјаните од европскиот север.