По скапото октомвриско луксузирање со тешко стекнатиот рејтинг, новата генерација на младата фудбалска репрезентација на Македонија е пред нов испит во квалификациите за Европското првенство во Италија и Сан Марино во 2019 година. Шокантниот пораз од тоталниот аутсајдер Гибралтар во Португалија ќе се „пере“ утре попладне (13 ч.) на „Телеком арена“ против Австрија во четвртиот настап во групата 7. Паралелно со анализите и подготовките за натпреварот, селекторот Благија Милевски потпиша и дополнителна покана. Ја адресира до Елиф Елмас од Фенербахче чие присуство во националниот тим овојпат треба да биде од големо значење во желбениот обид на „црвено-жолтите“ за втора радост во циклусот.
„Гибралтар е заборавен. Фокусирани сме на Австрија и се надевам дека целта ќе биде исполнета. Направивме добра анализа и верувам дека ќе одиграме квалитетно. Австријците несомнено поседуваат квалитет, но ние сме насочени кон нас самите, кон нашето издание. Иако има уште шест меча, сепак, утрешниот може да биде клучен за конечниот пласман. Притисок е присутен меѓутоа мора да научиме да се носиме без оглед дали е позитивен или негативен“, изјави селекторот Милевски.
Македонија моментно е последна во седмата квалификациска група по три одиграни меча во кои запиша два пораза (во гости од Гибралтар – 0:1 и дома од Србија – 0:2) и победа ( во гости над Ерменија – 3:0). Покрај дуелот во Скопје, утре напладне (12 ч.) во Ереван ќе играат и Ерменија – Србија. Северниот сосед е лидер на табелата со максимален ефект (12 бода) по четири одиграни средби пред Русија која има 10 бода од пет натпревари.