Со вода ги испратија, крај вода отседнаа. За среќно од пред хотелот „Александар Палас“ во Скопје, за комфор и мир во „Мериот“ во Сопот, на брегот на Балтичкото море. Младата фудбалска репрезентација на Македонија пристигна на крајното одредиште на полскиот север каде од 16 до 30 јуни ќе дебитира на Европските првенства за играчи до 21 година.
„Конечно дојде време да покажеме дека пласманот на ова Европско првенство не беше случаен. На секој меч ќе влеземе со желба за надигрување. Имаме респект кон сите ривали во групата, но не стравуваме од никого. Не гледам причина за такво нешто. Притисок е присутен межутоа позитивен како мотив плус за нас во намерата да продолжиме како што завршивме во квалификациите. За нокаут фаза не разислуваме. Ќе одиме чекор по чекор, од натпревар во натпревар“, коментира стоперот Ѓоко Зајков од белгиска Шарлроа.
По Франција, Исланд, Украина, Шкотска и Северна Ирска во квалификациите, пред момците на Благоја Милевски се три нови предизвици во групата Б. Премиерата е на 17 јуни (20,45 ч.) против Шпанија во Гдиња, за три дена подоцна во Бидгошч е закажан дуелот со Србија (18 ч.) и во вечерен термин (20,45 ч.) на 23 јуни, повторно во Гдиња, е пресметката со Португалија.
„Се надевам дека ќе бидеме на посакуваното ниво во Полска. Дел сме од најдобрите млади репрезентации во Европа и здрави, прави и подготвени ги очекуваме настапите. Во пристапот, во стилот на игра и во концепцијата нема ништо да менуваме. Ќе играме со истиот жар како во квалификациите иако имаме силни ривали со одлични индивидуални капацитет. Меѓутоа можам да порачам дека овие наши момчиња не смее никој да ги потцени. Поседуваат и фудбалски и човечки квалитети“, нагласи селекторот Благоја Милевски.
„Надежите“ кои повеќе не се надежи, туку докажани играчи, се силно зачекорени и во сениорскиот национален тим. Тие се креатори на најголемиот фудбалски успех по осамостојувањето на Македонија и први што успеаја ја обезбедат место на завршен турнир низ квалификациски циклус. И тоа како првопласирани во групата, а на ЕП 2017 отпатуваа без пораз во 13 средби во низа.
Импресивниот резултатски континуитет, само по себе, е доволен показател за одличната атмосфера во соблекувалната и на тренинзите, за завидното ниво на самодоверба, за потенцијалот што го поседуваат и за можноста уште повеќе да напредуваат во кариерите. Самото нивно присуство во Полска е успех со оглед на приликите што ги претставуваа во изминатиот период и несомнено ќе продолжат да го чинат тоа и во наредниот.
„Возбуда е присутна од долгоочекуваниот момент што се наближува. Можам да кажам дека сме подготвени за уште една голема работа како нова причина за радост и за задоволство. Против себе ќе имаме една Шпанија која ја вбројуваат како една од најсилните на овој турнир. Во минатото покажавме дека знаеме и можеме да се носиме со таквите. Против сите сме 11 на 11. Пред нас се три натпревари за кус временски период. Кога нема да можеме на физички план, тогаш ќе оставиме срце на терен за добар резултат“, порача Давид Бабунски од Јокохама маринерс.
Од нив никој не очекува шампионска титула или минување на групната фаза, ниту пак наметнува некаков императив. Единствено што се очекува е добра игра, а ако биде дотолку добра и ефектуирана со резултати, тогаш секој позитивен против Шпанците, Србите и Португалците ќе биде рамен на бинго. Фактот дека се дебитанти и статусот на аутсајдери за едни или „отпишани“ за други може да биде во корист на Македонија во претстојните мечеви со пиринејските репрезентации во Гдиња и со балканскиот сосед во Бидгошч.