Сирија е во еуфорија, воено разорената држава е на нозе. Солзите останаа декор на лицата на напатениот сириски народ од шестгодишната бруталната граѓанска војна, но овојпат се радосници. Националниот фудбалски тим ја мина квалификациската група и ќе игра бараж за Светското првенство во 2018 година.
https://www.youtube.com/watch?v=oWA-iMi76Kg
Чудото се случи во Техеран. Сирија одигра 2:2 против Иран во последното 10. коло во групата А од азиските квалификации, а во прилог ѝ беше и ремито во Ташкент меѓу Узбекистан и Јужна Кореја (0:0) за конечно освојување на третото место на табелата. Велиме чудо од причина што сирискиот национален тим ги одигра сите натпревари во циклусот надвор од својата земја. Како домашни ги пријавија стадионите во Серембан и Малака во Малезија поради воените дејствија на копно и од воздух против т.н. Исламска држава и силите лојални на опозицијата на претседателот Башар ал Асад.
„Ова е најсреќен ден во мојот живот“, изјави Башир Рахал, 26 годишно сириско момче кој натпреварот против Иран го следеше во еден од хотелите во главниот град Дамаск.
На радоста во Сирија и немаше крај. Телевизискиот пренос од Техеран не се следеше само во затворени објекти, кафилуња, ресторани и спортски сали туку и под отворено небо. На големите плоштад во Дамаск беа поставени видео бимови што собраа голема маса на луѓе, а последниот свиреж на главниот судија во Техеран продуцира „екплозија“ од воодушевување во Дамаск, скандирање „Сирија, Сирија и заглушувачки автомобилски сирени.
„Ден за паметење. Денеска славиме две победи. Армијата влезе во Деир ел-Зур и израмнивме против Иран што е еднакво на победа. Сирија е сведок на заживување, на будење, многу народ е собран на улиците на Дамаск. Вакво нешто немаме видено од почетокот на кризата“, вели Фаед Шмаис, 46 годишен вработен во сириската Влада.
Репрезентацијата на Сирија во октомври ќе игра бараж двомеч со Австралија. Подобриот од дуелите во ноември ќе оди на мегдан и со четврто пласираната селекција во КОНКАКАФ зоната (Фудбалска конфедерација на Северна и Централна Америка и Карибите) како завршен филтер за Русија. Иран и Јужна Кореја на првото, односно, второто место во групата А обезбедија место на мундијалот догодина.