Ситуацијата во Македонија е многу сериозна а одлуката за колективна аболиција на претседателот Ѓорѓе Иванов само ја продлабочи кризата. Оттаму и изборите на 5.јуни се незамисливи.
Ова го тврдат поранешниот амбасадор на ЕУ во Македонија, Ерван Фуере и Питер Ванхауте, белгискиот експерт кој до неодамна беше посредник помеѓу партиите по Договорот од Пржино.
Фуере, кој се поотворено ја критикува владејачката партија ВМРО-ДПМНЕ на социјалните мрежи, потенцира дека ситуацијата од неговото заминување до денес е се полоша.
– Се плашам дека ситуацијата е многу полоша. Не може да се каже дека постои демократија во Македонија. Шансата беше минатата година со политичкиот договор потпишан од лидерите на политичките партии, но сите обврски од него не се испочитувани. Можеби по нешто да, но имаше сериозни потценувања на политичкиот договор. Сега имаме датум за избори закажан на 5.јуни но нема услови за тоа. Пред да се одржат изборите потребна е построга оценка на условите. Верувам дека треба да се земе предвид иднината на земјата, бидејќи избори во овие околности само ќе ја влошат кризата, тврди Фуере.
Фуере дополнува дека одлуката на Иванов е скандалозна, дека мора да ја повлече веднаш и со добра волја да поднесе оставка од функцијата.
На прашање на НОВА, каква била неговата комуникација со владејачката партија додека беше претставник во на ЕУ во Македонија, Фуере вели разговарал и укажувал, но ветувањата останале празни.
– Разговарав со нив и многу пати им дадов до знаење дека мора да ги почитуваат сите обврски кон реформите и многу често, како што е нотирано тоа во Извештајот за напредокот, тие не го направија тоа. Ветуваа многу често, но како што гледаме, поголемиот дел од нивните ветувања не се остварени, изјави поранешниот амбасадор на ЕУ во земјава.
Во своите констатации за кризата ништо поразличен не ниту Ванхауте. Тој пак вели, Иванов освен што ја продлабочил кризата, ги оневозможил и евентуалните преговори.
– Условите за фер избори мора да бидат исполнети. Тука е и проблемот со одлуката за аболиција на претседателот. Без да се решат овие две работи, нема шанси за отпочнување на некакви нови преговори, вели Ванхауте.
Ванхауте нагласува дека откако престанале преговорите помеѓу партиите, тој особено и укажал на меѓународната заедница дека проблемите ќе продолжат а реформите ќе бидат запоставени.
– Од моментот кога престанав со преговори, зборував и со меѓународната заедница и со амбасадорите и им кажав дека кризата само ќе се продлабочи. Но некогаш кризата не е лоша, туку може да биде стимул за изнаоѓање решение и да се види кој е проблемот и што треба да прземеме. Денес јасно е кој е проблемот но прашањето е како да дојдеме до решавање на тој проблем, потенцира белгискиот посредник во својот одговор.
Одржувањето на изборите на 5.јуни е се понеизвесно. Откако речиси целиот опозициски политички блог најави дека нема да учествува на избори на кои нема да има фер шанса за сите, аналитичарите ја очекуваат одлуката на албанскиот партнер во владата, ДУИ. Со нивно откажување, изборите на 5.јуни, иако закажани веројатно нема да се одржат.
Опозицијата пак, откако спикерот Трајко Вељаноски ги распиша изборите, испрати ултиматум за евентуални нови преговори. Парламентарците да се вратат во Законодавниот дом и да изгласаат одложување на изборите, а Ѓорѓе Иванов веднаш да ја повлече одлуката за колективно аболирање на 56 политичари и луѓе блиски до нив за земјата да ги врати демократските вредности и владеењето на правото.