Беса никогаш нема да прифати платформа која е против граѓаните на Република Македонија.
Ова е пораката на Африм Гаши од движењето БЕСА, кој во емисијата 360 степени на Алсат-М рече дека тие нема да бидат дел од документ кој што ќе биде на штета на било кои граѓани во Македонија.
„Сакам да ги осигурам граѓаните Македонци и припадниците на другите заедници во земјата дека барем Движењето БЕСА никогаш нема да биде дел од некој документ кој ќе биде на штета на своите сограѓани. Колку што сме заинтересирани да воведеме добросостојба и реализација на Албанците во Македонија, исто толку сме заинтересирани и Македонците и другите етникуми во Македонија да се чувствуваат добро, спокојно и да бидат почитувани како лојални граѓани на оваа држава“ изјави Гаши.
Неговата изјава следува како резултат на се понагласените тврдења на партијата ВМРО-ДПМНЕ дека платформата на албанските партии е противуставна и не е во интерес на македонските граѓани.
Неодамна пак лидерот на СДСМ, Зоран Заев, кој се уште е во исчекување на мандатот од претседателот Иванов, кој рече дека токму платформата е една од причините да не го додели мандатот за состав на новата влада, претстави програма и порача дека со идниот владин документ треба да престанат сите шпекулации за наводни платформи и декларации а дека единствениот пат на Македонија е нова влада која ќе работи на реформите од Прибе.