За Аурелио де Лаурентис посредништво е беспотребно и прави само штета на релација клуб – играч
Менаџерите во фудбалската игра се одамна присутни, а со нив и дебатите за нивно постоење. Додека едни немаат против, други се категорични дека посредништво е непотребно. На првата линија на фронтот кај вторите застана Аурелио де Лаурентис, сопственик на Наполи, кој порача дека менаџерите се беспотребни и само прават штета на релација клуб – играч.
„Тоа е рак во нашата професија. Лично јас не разбирам потреба од нивно постоење“,
директен е првиот човек на калчолигашот од „Сан Паоло“ кој е познат италијански филмски продуцент и продолжи:
„Во Холивуд, на пример, актерите се сами на себе менаџери. Зошто ги има во фудбалот? Правите договори на пет години, а нивна цел е константно да примаат плата. Кога ќе ги земат сите пари, тогаш ги носат фудбалерите на шопинг и им прават муабет од типот „знаеш преговарам со тој и тој клуб, ќе те платат два милиона повеќе“.И тогаш играчите не играат како треба“.
Де Лаурентис нагласи дека покрај Наполи би сакал да има клуб и во САД и Кина. Нејасна е причината за ваквиот негов став кон фудбалските менаџери. Некои кругови, сепак, веднаш најдоа можна поврзаност со Антоан Гризман кој неодамна порача дека продолжува да игра без посредници. „Од сега ќе играм фудбал без менаџери. Секогаш, секако, ќе почитувам совет од мојот татко и од менторот Ерик Олац, но одлуките за транфери во иднина ќе ги носам сам“, изјави францускиот репрезентативец за „Лекип“