Фамозната фирма „Гентомар“ била единствен понудувач на огласот на ЈСП-Скопје за продажба и надополнување на автобуските картички „Скопска“. Договорот во вредност од 383.000 евра е објавен денеска на интернет страната на Јавни набавки. Според него, продажбата на автобуските карти на ЈСП во наредните две години ќе ја врши „Гентомар“.
НОВА ТВ подолго време истражува која е и чија е „Гентомар“, фирмата што го доби и претходниот тендер на ЈСП за дистрибуција на автобуските картички.
„Гентомар“ е тешко е да ја се пронајде на Интернет, преку телефон како и на адресите кои за неа се достапни во Централниот регистар и Електронскиот систем за јавни набавки.
На адресата „Франклин Рузвелт 4 лок. 5“ која е наведена во официјалните документи во Централниот регистар како седиште на компанијата има продавница за животни. Нема трага од фирмата дилер на ЈСП.
Како нивно седиште во основачкиот акт од Централниот регистар се појавува уште една адреса во една зграда во Капиштец. Но, наместо компјутерска компанија, таму се наоѓа салон за убавина.
Според податоците од Централниот регистар, сопственик на компанијата „Гентомар“ е Боби Кузмановски, фирма формирана во март 2014 или 15 месеци пред доделувањето на набавката од страна на ЈСП.
Кузмановски по професија е професор по физичко воспитување. НОВАТВ открива дека претходно Кузмановски бил вработен компанијата „Бизнис инвестмент груп“ – компанија во сопственост на Стефан Пулејковски и Благој Јовчевски.