Советничката група на ВМРО-ДПМНЕ сака да ја блокира работата на Општината Гази Баба, информираше денеска на прес-конференција градоначалникот Борче Георгиевски.
„Со тоа што ВМРО-ДПМНЕ поради наводна солидарност со притворените учесници и организатори на крвавите настани во Собранието на 27, на предлог од претседателот на Советот поддржан од советниците од ВМРО-ДПМНЕ, спречи да се донесе нацрт буџетот на општината. Наместо да одберат развој и буџет на општината, ВМРО-ДПМНЕ одбра да постапи по наредба на Никола Груевски. Ова не е прв пат ВМРО-ДПМНЕ да се обиде да ја блокира работата на Советот на општината“, рече градоначалникот.
Тој додава дека идејата за која знаела и советниците на ВМРО-ДПМНЕ била буџетот требало да се носи во две фази.
„Иако секогаш и за се биле уредно консултирани, советниците на ВМРО-ДПМНЕ работат свесно на штета на граѓаните. Доказ за тоа се и записниците од работните тела, на кои учествуваат и советниците на ВМРО-ДПМНЕ, каде што даваат поддршка за сите програми кои се составен дел на буџетот. Оваа блокада која денеска ја прават значи опасност да се исплаќаат плати, да се реализираат веќе започнатите активности, со еден збор блокада на системот на општината, која е на директна штета на граѓаните“, рече Георгиевски.
Градоначалникот вели дека ако советниците на ВМРО –ДПМНЕ не се вразумат и продолжат со блокирањето на буџетот ќе одат со мерката времено финансирање на општината.
„Сакам да им порачам на советничката група на ВМРО-ДПМНЕ дека протестираат на погрешна адреса. Општина Гази Баба не е кривичен орган и не притвора никого. Тука се во општината треба да се работи во интерес на граѓаните, а не на паријата. За жал советниците на ВМРО-ДПМНЕ очигледно не знаат како се работи во интерес на граѓаните“, смета Георгиевски.