Властите во Германија го прогласија Хезболах за терористичка организација и забранија активност на нејзини членови на германска почва. Во моментот во тек се полициски рации врз четири здруженија поврзани со исламистичката група.
„Германскиот министер за внатрешни работи Хорст Зехофер денеска ги забрани активностите на Хезболах во државата“, објави портпаролот на германското МВР на Твитер.
Тој, исто така, потврди дека во тек се „полициски мерки во неколку сојузни држави истовремено“ и додаде дека дури и во време на криза „владеењето на правото е во состојба да дејствува“.
Полициските рации се фокусирани на четири здруженија на џамии во Берлин, во Дортмунд, во Бремен и во Минстер кои се обвинети за припадност кон Хезболах. Властите проценуваат дека околу 1.050 луѓе во Германија се активни членови на либанската милитантна група.