Германскиот Бундестаг вечерва ќе гласа за Резолуцијата со која се дава поддршка за европската иднина на Северна Македонија, со која оддава признание на македонската култура, идентитет и јазик, и 13 точки препораки за владата во Берлин, како чин на поддршка на граѓаните на нашата земја пред претстојното гласање на уставните измени кое ја вжешти политичката ситуација вои Македонија. Резолуцијата ја поднесоа парламентарните групи на трите владејачки коалициски партнери во владата: Социјалдемократите, Зелените и Либералите.
Според македонската редакција на Дојче Веле текстот на Резолуцијата е следниов:
„2023 е клучна година за европската иднина на Северна Македонија. Германија е цврсто посветена на европската перспектива на Северна Македонија и решително ја поддржува земјата на нејзиниот пат кон Европската унија.
Во последните две децении, Северна Македонија мина низ различни фази, во кои постоеше ризик од губење на јасната ориентација за приближување кон ЕУ и нејзините вредности. Во последните години земјата се врати на реален и амбициозен евроатлантски курс и реформски процес“, се наведува во Резолуцијата.
„Пристапувањето на Северна Македонија во ЕУ е во обостран интерес. Успешниот пат кон пристапувањето во ЕУ има далекусежни симболични ефекти за целиот регион. Северна Македонија е мултиетнички модел. Германскиот Бундестаг ги признава македонската култура, идентитет и јазик. Во Европската Унија, која се карактеризира со голема разновидност на јазици и култури, јазиците се составен дел од нашето заедничко културно наследство. Јазичната разноликост се практикува во повеќејазичноста на програмите и во работата на институциите. Македонскиот јазик и култура дополнително ќе ја збогатат оваа разноликост. Европската унија го смета зачувувањето и заштитата на ова богатство како една од нејзините најважни задачи“, се заклучува во Резолуцијата.