Дијалогот со Бугарија и испорака на реформи – се уште се главен услов Северна Македонија да ги почне претпристапните преговори за членство во ЕУ, порачаа евроамбасадорот во ЕУ Дејвид Гир и францускиот амбасадор Сирил Бомгартнер на денешната прес-конференција во седиштето на ЕУ во Скопје.
Известувајќи за чекорите на ЕУ за поддршка на Украина, на новинарските прашања дали ситуацијата во Украина ќе го забрза интегрирањето на Западен Балкан во ЕУ тие нагласија дека регионов останува стратешки интерес за Унијата и потсетија на заклучоците на европските лидери на состанокот во Брдо пред неколку месеци.
„Ситуацијата во Украина ја нагласува важноста на блиското партнерство со ЕУ и вредноста на Северна Македонија како членка на НАТО. Имаме силен стратешки интерес да ја видиме Северна Македонија членка на ЕУ, но треба да испорачате реформи“, порачаа европретставниците нагласувајќи дека нашата земја постигнала забележителен напредок.
Во однос на дијалогот со Бугарија и можноста ЕУ да се вклучи, беше речено дека треба да бидат оставени двете страни сами да дојдат до решение. „Да му дозволиме на процесот да се одвива во најдобри можни услови“, рекоа амбасадорите.
Амбасадорската двојка категорично ги отфрли споредбите меѓу руско-украинските односи и бугарско-македонските кои се често присутни, како што беше речено на социјалните мрежи, велејќи дека за разлика од агресорскиот пристап на Москва и нарушениот територијален интегритет на Украина, Бугарија била меѓу првите земји што ја призна Македонија и ја поддржа во НАТО, а исто така и помогна за евакуација на дваесетина македонски државјани од Украина.
Во врска со можноста Северна Македонија и Албанија да влезат во брз пакет со Украина за ЕУ, беше речено дека за Украина европските лидери допрва ќе одлучуваат за следните чекори, и дека процедурите за секое членство се јасни а одлуките ги носат лидерите на Унијата.