Луи ван Гал (65) се збогува со фудбалот. Поранешниот тренер на Ајакс, АЗ Алкмар, Барселона, Баерн Минхен и Манчестер јунајтед и селектор на Холандија заминува во пензија, објави холандски „Телеграф“. Неговата одлука за повлекување од сцената е последица на семејни причини и покрај понудата „тешка“ 50 милиони евра за тригодишен ангажман во Азија.
„И лани реков дека ќе престанам со оваа работа, но подоцна ја променив одлуката и решив прво да одморам. Да бидам искрен сакав да се повлечам и по Светското првенство. Сега верувам дека овојпат е конечно и нема да се вратам. Многу работи се случија во потесното семејство во изминатиот период што се еден вид на будење“, рече Ван Гал за „Телеграф“.
Весникот притоа ја поврзува одлуката за пензионирање на Ван Гал со изненадувачката смрт на сопругот на една од неговите ќерки во минатиот месец.
Холанѓанецот беше без ангажман од мај минатата година. Последен клуб во кој работеше е Манчестер јунајтед што го напушти по два дена од освојување на пехарот во ФА купот. Има и четири титули во Холандија од кои три со Ајакс и една со АЗ Алкмар. Со тимот од Амстердам триумфира и во Лигата на шампиони во 1995 година. Каталонците ги предводеше до два трофеја во Примера и по еден во кралскиот куп и во Суперкупот на УЕФА како и Баварците до тронот во Бундеслигата во 2010 година.