Од ГОБ „8 септември“ изразуваат јавна благодарност до македонските фудбалски репрезентативци за донираната медицинска опрема во борбата против ковид-19. За иницијативата и акцијата што ја почнал Стефан Ристовски, како што стои во соопштението на болницата, дознале преку социјалните мрежи и биле пријатно изненадени.

„Од инстаграм дознавме дека анонимната донација што ја добивме била од наши сограѓани, пријатели, донатори помагаат во овие тешки времиња кога се бориме со пандемијата на ковид-19. Голема благодарност за иницијативата што ја почнал Стефан Ристовски и неговите
другари, соиграчи во А репрезентацијата на РСМ. Ве чекаме и се гледаме на стадион во подобри времиња“, се наведува во дописот од ГОБ „8 септември“.

Донацијата, како што објавија дел од македонските фудбалски репрезентративци на социјалните мрежи, се состои од одредени количини на маски КН95, скафандери, капи, каљачи, средства за дезинфекција на раце и површини, ракавици, гелови, хируршки маски, заштитни визири.

Од ГОБ „8 септември“ воедно изразија благодарност и за донацијата на „УВ гард“ за дезинфекција
на површини и воздух од вируси и бактерии, изум од македонските иноватори Ивица Поцков и Никола Глигоров. Од здравствените работници и вработените во болницата кои во овие моменти го даваат својот максимум во справување и лекувањето на пациентите од ковид-19, изразуваат голема благодарност до македонските иноватории кои го донираа својот изум на болницата.